A cuarta edición da ‘Gladiator Race’ organizada polo Inorde co apoio de Turismo de Galicia, celebrábase na noite do sábado 22 de outubro na área recreativa do Corgo, en Muíños, cun formato único en España neste 2022 ao volver a desenvolverse en horario nocturno, reunindo a máis de 300 participantes procedentes de 14 provincias sobre todo, do noroeste peninsular e de Portugal, entre eles o barquense Jesús Rodríguez León que subía ao segundo chanzo do podio.
Esta proba, ao igual que as anteriormente organizadas polo Inorde (Ourense Strade Termal, Arnoia Termal Sports, Xurés Bike Tour e a Ribeira Sacra Cycling Road), volveu a demostrar que Ourense é o escenario perfecto para a práctica do deporte tanto de élite como popular.
A ‘Gladiator Race’, que forma parte da Liga Nacional de carreiras de obstáculos, puxo a proba aos deportistas cun percorrido de 5 km no que debían superar máis de 25 obstáculos que incluía subir por pirámides, zonas de equilibro, probas de forma e moitas aventuras máis. Ademais, de contar con participantes amateur, déronse cita deportistas de primeiro nivel que viñan para gañar como a actual campioa de España e o mellor equipo de Cangas “Os Vengadores”. Os participantes tiveron que levar un frontal luminoso xa que o 90% do percorrido estaba sen iluminar. Ademais, puideron participar de xeito individual ou por equipos de mínimo 5 integrantes.
Finalmente o vencedor desta cuarta edición da ‘Gladiator Race’ na categoría élite foi Oskar Novo Rodríguez, o segundo posto foi para Jesus Rodríguez León e o terceiro para Mikhail Artemev. Na categoría popular o gañador da proba foi Anxo Otero Amoedo, o segundo posto foi para Alberto Pacheco Soliño e o terceiro para Matías Barreiro Ruibal.
