Máis de mil comensais na XVI edición no Barco celebrada en xaneiro, máis de 250 na III edición do xantar na Coruña en febreiro e unhas 150 na II edición da festa en Vigo. É o balance dos xantares promocionais da Festa do Botelo do Barco que vén de completar o percorrido neste 2016, no que segue triunfando dentro e fóra de Valdeorras.
A última cita, tiña lugar o 5 de marzo no salón do Hotel Coia de Vigo, o mesmo que acollía o xantar o ano pasado. Un exquisito xantar que comezou pasadas as 14:30h. con empanada de maravallas e sopa, e a continuación serviuse o botelo (estómago do porco recheo de costelas e osos da cabeza adobadas afumado e posteriormente cocido), acompañado con viño branco da adega D´Berna e tinto Valdouro da Cooperativa Xesús Nazareno do Barco. De postre, torta de roxóns e música para o baile que pechou o acto.
Un acto ao que por segundo ano asistían o alcalde de Vigo, Abel Caballero e a presidenta da Deputación de Pontevedra, Carmela Silva, acompañando na mesa presidencial ao alcalde do Barco de Valdeorras, Alfredo García e a concelleira de Cultura e Educación, Margarida Pizcueta. Antes de comezar os dous alcaldes dirixían unhas palabras aos asistentes, asegurando que “o mellor de ser alcalde é poder reunirse e falar coa xente, cos veciños, polo que é un pracer esta hoxe aquí”, en palabras de Abel Caballero, e ratificando a idea de “irmanar Vigo e O Barco”, podenso ser este encontro gastronómico un punto de partida.
Máis información na vindeira edición do Periódico O Sil.
Fotos: Carlos G. Hervella.
