Por primeira vez na súa historia, a UD Ourense vencía ao CD Barco. Facíao na tarde deste domingo 1 de novembro, no derbi provincial disputado no campo ourensán do Couto, partido correspondente á terceira xornada de liga en terceira división.
Os equipos dirixidos por Fernando Currás e Manolo Pérez saltaban ao campo dispostos a sumar os tres puntos en xogo. O Ourense necesitábaos para estrearse nesta tempada na que aínda non conseguira puntuar e O Barco para manterse na zona alta da táboa (vencía na primeira xornada e empataba na segunda), pero a primeira parte do partido remataba sen apenas oportunidades.
Habería que esperar ata o minuto 61, xa na segunda metade para que Gabi Sanín anotara o primeiro gol local. O segundo chegaba no minuto 84 da man de Amin que sentenciaba o encontro co 2-0 e sumaba os tres primeiros puntos para os ourensáns.
Con esta derrota, o CD Barco baixa ata o 8º posto da táboa á espera de recibir en Calabagueiros ao Arousa (4º clasificado) na vindeira xornada. A UD pola súa banda sitúase no 10º posto e o vindeiro domingo viaxará ata O Porriño para enfrontarse ao Pontellas (un posto por debaixo na clasificación).
Fotos: Sandra García
