
Intentárono na pasada tempada pero ían moi xustos de tempo así que será nesta, cando o CD Barco saque por primeira vez na súa historia, un equipo filial.
Tal como avanza o presidente do club vermello, Nilo Ramos, na última asemblea acordaban que se había interese e xente, formarían un novo equipo e visto que se cumpren os dous requisitos, sairá na tempada 2024/2025 que xa están perfilando.
“Trátase de darlle continuidade aos xogadores de base que quedan na vila e tamén un pulo aos xuvenís”, di Ramos, recoñecendo que están moi ilusionados. “Como é lóxico sairán en terceira rexional, baixo as ordes de Ricardo Prada e xa temos 19 xogadores”, di, asegurando que o equipo xa está federado.