Non pudo ser. Trala goleada ao CD Córgomo Vilamartín e o pase á seguinte rolda da Copa Deputación, o CD Barco tiña moitas esperanzas postas no partido desta tarde para sumar os tres puntos e escalar algún posto na liga, pero nin o xogo nin os goles axudaban a logralo, tendo de conformarse cun empate e 1 punto.
Pasadas ás 16:45 horas deste domingo 10 de decembro comezaba no campo municipal de Calabagueiros o partido da xornada 15 na Preferente sur entre o CD Barco e o Antela FC que prometía ritmo e espectáculo pero quedou sen forza.
Eran os de Lino Estévez os que se adiantaban no marcador cun temperán gol de Javi Pazos no minuto 4, chegando ao descanso co 1-0 favorable. Parecía que por fin os vermellos lograrían a ansiada vitoria en casa ata que no 70′ os visitantes empataban o encontro. A partir de aí Lino esgotou os cambios oportunos buscando, sen resultado, o gol da vitoria, ata que finalmente co 1-1 pitaba o colexiado o final do encontro sumando un punto cada equipo.
Con este, o CD Barco suma o terceiro empate consecutivo e un total de 14 puntos, manténdose na metade inferior da clasificación. A seguinte cita será en Portonovo.
Fotos: Carlos G. Hervella.