Un punto. É o que sumaba o CD Barco tralo empate a uns co Celtiga FC no partido disputado na tarde deste domingo 26 de novembro no campo municipal de Calabagueiros.
O encontro presentábase con sorpresa para a afección barquense xa que o cubano Inle Valdés Mayarí saía ao terreo de xogo como porteiro titular, na que sería a súa estrea do período de proba no que se atopa trala marcha do portugués Ricardo van der Laan, con boas sensacións.
Xa no campo, foi un partido intenso con moitas e boas ocasións para ámbolos dous equipos aínda que unicamente transformaban en dúas ocasións. Os primeiros en marcar eran os locais co gol de Óscar Martín ao transformar un penalti no minuto 20. Parecía que o resultado ía quedar aí pero no 45′, os visitantes sorprendían a Valdés poñendo o 1-1, un resultado que xa non se movería tralo paso polo vestiario, co correspondente reparto de puntos.
Fotos e vídeos: Mónica G. Bellver.
