Dobre cita vitoriosa neste domingo 12 de novembro no campo de fútbol das Carrelas, en Viana do Bolo. Pola mañá, os cadetes superaban por 6 goles a 0 ao At. Valenzá e pola tarde o equipo sénior facía o propio no derbi co CD Córgomo Vilamartín.
O que comezaba ás 16:15 horas era un partido moi esperado, tanto polos equipos como pola afección, non só por ser un derbi senón pola situación de ambos equipos na táboa: o líder, CD Viana líder contra o segundo, o CD Córgomo. E ningún defraudou despregando un bo xogo malia a tensión, e moitos goles, un total de seis.
Eran os visitantes os que se adiantaban no marcador cun temperán gol de Daniel Real no minuto 6, aínda que os celestes reaccionaban cun gol de Héctor García no minuto 13. No 22′ Pablo Álvarez daba a volta ao marcador poñendo o 2-1 e no 31′ Héctor marcaba o seu segundo da tarde aumentando a distancia cos valdeorreses.
Co 3-1 chegaba o descanso e tralo paso polo vestiario, no minuto 47, Javier Gacía anotaba o cuarto gol para os locais. Parecía que o resultado quedaba aí pero no 78′ Sylla transformaba un penalti poñendo o 4-2 co que o árbitro pitaba o final.
Foi un intenso partido, seguido coma sempre por numerosos afeccionados, tanto dos incondicionais do CD Viana que seguen ao equipo na casa cada partido, como dos do CD Córgomo Vilamartín desprazados ás Carrelas para a ocasión.
Con este resultado o Viana mantense líder con 24 puntos, aumentando a distancia co Córgomo Vilamartín que segue segundo con 20.
Fotos: Carlos G. Hervella.
