O Festival de Cine de Ourense, que se desenvolverá entre o 23 de setembro e o 1 de outubro de 2022, outorgará nesta edición a Calpurnia International Honra ao cineasta e produtor arxentino Pablo Trapero.
A organización do festival concédelle este premio por “ser un dos directores máis relevantes e singulares do chamado Novo Cinema Arxentino, con vocación de cinema social e politicamente comprometido, desde o realismo, sen renunciar ás claves do xénero, cun estilo que bebe de fontes clásicas ligadas ao Neorrealismo, a Nouvelle Vague e a produción independente”. O OUFF recoñece a valentía do cineasta ao abordar temas moi relacionados coa realidade arxentina, co cinema como vehículo de sensibilización e para axitar conciencias.
Nado en San Justo, provincia de Bos Aires, a primeira longametraxe de Trapero, Mundo grúa, gañou o Premio da Crítica no Festival Internacional de Cine de Venecia en 1999. Posteriormente escribiu, dirixiu e produxo moitas películas aclamadas pola crítica e comercialmente exitosas que se presentaron nos festivais máis prestixiosos do mundo, coma o Festival de Cine de Cannes (5 películas), o Festival Internacional de Cine de Toronto (10) e Venecia (4). Entre as súas obras están El Bonaerense (2002), Familia Rodante (2004), Nacido y Criado (2006), Leonera (2008), Carancho (2010), Elefante Blanco (2012) e La Quietud (2018). Ademais, os seus filmes teñen recibido varios premios académicos coma o Goya, o Ariel e o Sur.
Formou parte do xurado de festivais como Venecia, San Sebastián e Locarno e en 2014 foi elixido presidente da sección ‘Un Certain Regard’ do Festival de Cine de Cannes. Foto galardoado co Chevalier l’Ordre deas Arts et deas Lettres polo Ministerio de Cultura de Francia en 2015, converténdose no primeiro director de América Latina en recibir esta distinción.
