O domingo 19 de marzo comezará a tempada de pesca fluvial 2023. Unha data que esperan con ilusión no Club de Pesca Deportiva Spinning Valdeorras que este ano presenta varias novidades. A primeira é a sede, que pasa do Barco a Vilamartín de Valdeorras, e a segunda e máis importante, que este ano a cuota para os nenos será gratis. A cuota sénior federada será de 40 euros e sen federar de 30 euros.
Xa dende a súa fundación Spinning Valdeorras fomenta a pesca responsable e o coidado do medio ambiente, por iso entre as actividades que desenvolven ao longo da tempada están os obradoiros de montaxe e a xornada de limpeza do río Sil que este ano teñen programada para o domingo 5 de marzo.
Dende o club tamén consideran “fundamental coller bos hábitos nos inicios por iso intentamos ofrecer aos máis xoves un deporte alternativo, co que garantir o relevo xeracional que coide dos nosos ríos e mares”, din. De aí que se centren nos máis pequenos en moitas das saídas de pesca que realizan, sen esquecer a competición. Nese aspecto, o presidente do club, Daniel Prada, destaca orgulloso que contan con socios clasificados para o Campionato de España que se celebrará en Ceuta.
