A IX edición da Ourense ICC Week, que se celebrará do 17 ao 23 de abril nunha ducia de localizacións da cidade e da provincia, ofrecerá ao público máis de vinte propostas para coñecer as últimas tendencias da industria e da creación cultural. Un amplo programa de actividades que abordarán desde a perspectiva cultural aspectos tan variados como a intelixencia artificial, a ilustración, ciencia, a estrea de producións audiovisuais, música, moda, radio, o emprendemento no rural e ata os camiños de Santiago.
“Ourense vai ser o epicentro do debate de tendencias e da innovación”, afirma o presidente da Deputación, Manuel Baltar, que pon o foco nos persoeiros das industrias culturais e creativas que se achegarán á provincia: “Nomes suficientemente atractivos, como en todas as edicións que levamos realizadas, tanto para o público en xeral como para os creadores de opinión”. Manuel Baltar felicitou ao coordinador da ICC Week, Juan Rivas, por un evento que “dá visibilidade a Ourense e permite acrecentar esa imaxe de provincia novidosa, con retos ambiciosos neste século XXI, no que temos moito que demostrar”.
Pola úa banda, Juan Rivas sinala que esta novena edición da Semana das Industrias Culturais e Creativas “permitirá coñecer a grandes referentes en temas de especial actualidade como por exemplo a intelixencia artificial, o lanzamento musical de grandes estrelas ou como convive a cultura tradicional cos novos medios”.
Co Observatorio Astronómico Trevinca (A Veiga) como imaxe do cartel desta novena edición, a Ourense ICC Week 2023 desenvolverase nunha ducia de localizacións. O Centro Cultural Marcos Valcárcel acollerá a meirande parte das actividades, que se celebrarán ademais no Teatro Principal; na Escola de Arte e Superior de Deseño Antonio Faílde; na Escola Superior de Enxeñería Informática (ESEI); na localidade de Senderiz, en Lobeira; no CIFP da Farixa; e os xardíns Padre Feijoó da capital.
A creatividade ten múltiples facetas, algunhas das cales se tratarán nesta semana de actividades. Entre elas figura a moda e a economía creativa coa participación dun deseñador de renome como Modesto Lomba; da consultora en moda e sostibilidade Charo Izquierdo; e do encargado de vestiario de Tanxugueiras no Benidorm Fest 2022, o estilista e deseñador vianés, Jorge Álvarez. Ademais de sacar as súas propias coleccións e seguir traballando en varios proxectos coas cantareiras do século XXI, De Álvarez viste a personaxes televisivos como Esther Estévez, Agoney, Ruth Lorenzo, Rozalen, Inés Hernand, Laura Matamoros ou Lorena Castells.
Este encontro celebrarase no Marcos Valcárcel o 18 de abril a partir das 20 horas e será moderado pola directora xeral da Asociación de Creadores de Moda de España (ACME), Pepa Bueno. Toda a información da novena edición da ICC Week, na súa web: https://ourenseiccweek.com/es/
