A aposta do Club Adas Proinor por reforzar o seu equipo feminino comeza a dar os seus froitos. As atletas valdeorresas ganaban por equipos no XIX San Silvestre Popular-Cidade de León, celebrado o 27 de decembro. O mellor resultado conseguíao a vilamartinesa Eva Arias que vencía na categoría absoluta cun tempo de 00:23:44. Ademais as súas compañeiras de club, Joanna Filipa Pereira e Iria Fernández quedaban terceira e quinta, respectivamente.
Na carreira tamén competían dous equipos masculinos do Adas, un dos cales quedaba cuarto e o outro noveno. En canto aos resultados individuais, destacaba o noveno posto de Alejo Ares Prada, na categoría masculina absoluta, cun tempo de 00:21:30. “É dos mellores resultados individuais que temos logrado nesta carreira, na que había ademais moito nivel”, destaca o presidente do Club Adas, Agustín González, quen tamén resaltaba o excelente resultado feminino e a “boa carreira de Eva Arias”.
Fotos: Club Adas Proinor