Ata tres pezas relacionadas coa provincia de Ourense formaban parte do repertorio do concerto que o grupo Escaravellos (formado por Belén Bravo, Ana Abalde, Pili Fernández, Leni Pérez e Rique Freiría) ofrecía o 15 de febreiro na Sala Rebullón, no municipio de Mos. A primeira delas interpretábana xusto ao inicio do concerto: a “Muñeira de Cadós”. Esta canción está recollida nesta aldea do concello de Bande.
Cara a metade do concerto chegaba un momento moi especial. Este grupo, con sede en Beade (Vigo), estreaba “Adeus Viana”, unha canción (con música de Rique “Pexeiro” e letra de Pili Fernández), cuxo inicio di: “Cando saín de Viana do Bolo/ choraban bágoas estes meus ollos”.
Está adicada a esta vila e ao investigador vianés Carlos Ares. A composición, que fala do sentemento da emigración, nacía tras a estadía deste grupo en Viana do Bolo o pasado ano nun acto para conmemorar as Letras Galegas. De feito, no concerto Rique presentaba o tema cunha adicatoria a este vianés en particular e a todos os emigrantes en xeral.
Case ao final da actuación tocaban “O Ferreiro”, un canto do liño recollido en Celavente (O Bolo) e que Escaravellos colleron do Cancioneiro Popular Galego publicado pola Fundación Pedro Barrié de la Maza.
Fotos e vídeo: Carlos Ares.
