Esta mañá saía adiante na Comisión 2ª do Parlamento galego unha iniciativa impulsada polo BNG para pedir que a estrada OU-533 (ente A Gudiña e A Rúa) se arranxe na maior brevidade posible e que a Xunta a incluír unha partida específica nos orzamentos de 2025 para a execución das obras. Na iniciativa que o deputado nacionalista defendeu reclamábase que o proceso de contratación das obras se fixese antes de que rematase o 2024 pero o PP pediu substituír “antes de 2024”, por “na maior brevidade posible”.
Fernández quixo lembrar que o BNG se interesou “numerosas veces polo seu arranxo e mellora” e salientou a importancia de acometer as obras dunha vía “de grande importancia como elemento vertebrador do oriente ourensán. A estrada transcorre durante 50 km por unha zona de montaña cun trazado moi sinuoso e co porto de montaña do alto de Covelo, no termo municipal de Viana do Bolo, onde tamén provoca problemas ao tráfico rodado e aos peóns ao seu paso pola vila “polo sinuoso e angosto do seu trazado nesta travesía”, subliñou.
O parlamentario do BNG advertiu que “estamos ante unha estrada con abundantes curvas, o que lle confire unha especial perigosidade”, á vista do importante número de accidentes que houbo ao longo do seu trazado, algúns deles de moita gravidade e con numerosas mortes. A sinuosidade e perigo é aínda máis importante no tramo duns 20 km entre A Gudiña e Viana do Bolo, no que “non hai ningún carril para os vehículos lentos e as zonas para adiantar son practicamente inexistentes”, advertiu.
Fernández insistiu na importancia da OU-533, xa que se trata dunha estrada que ten unha importante circulación ao servir de eixo do oriente ourensán, unindo a comarca de Valdeorras coa A-52 na Gudiña. Tamén circulan por esta estrada moitos vehículos e grande numero de mercadorías que se dirixen cara o norte de Portugal e que proceden de Valdeorras,de Lugo ou mesmo da comarca do Bierzo, León, Asturias e incluso Cantabria. Ademais inflúe no incremento do tráfico a estación da liña de AVE da Gudiña, que leva a moitas veciñas e veciños da comarca de Valdeorras e de Viana do Bolo a utilizar dita vía. Estamos polo tanto ante unha vía de moito tráfico, cun alto volume de tráfico pesado.
Durante a comisión, o portavoz do PP de Infraestruturas, Roberto Rodríguez, explicou que a Xunta xa ten elaborado un estudo previo para determinar as necesidades de mellora da estrada OU-533, analizando as necesidades de acondicionamento deste viario ata conseguir uns parámetros de trazado homoxéneos. En concreto, este estudo dividiu a estrada en catro sectores: conexión coa N-525, desde o quilómetro 0 ao 1; treito de A Gudiña a Viana do Bolo, desde o quilómetro 1 ao 15; a travesía de Viana do Bolo, entre o quilómetro 15 e o 22,5; e o tramo entre Viana do Bolo e A Rúa, desde o quilómetro 22,5 ao 50.
“Diante deste estudo, a Xunta considerou prioritario a intervención no tramo entre A Gudiña e Viana do Bolo, e, por iso, o pasado 16 de febreiro asino a orde para redactar o proxecto de acondicionamento deste tramo, que incluirá a mellora de interseccións, renovación da capa de rodaxe, sinalización, balizamento e defensas, así como o incremento e mellora de zonas de adiantamento, principalmente mediante a implantación de carrís adicionais”, apuntou. Roberto Rodríguez manifestou que o investimento estimado para esta actuación superará os 15 millóns de euros e a previsión é ter redactado este proxecto a finais deste ano 2024, co fin de iniciar as obras unha vez estea supervisado a información pública.
Tamén o PSdeG avogaba pola mellora da OU-533 no decurso da comisión parlamentaria. A deputada Carmen Rodríguez Dacosta aseguraba que a mellora desta estrada do oriente ourensán “é unha reclamación histórica do PSOE, que leva anos loitando por un proxecto que permita ampliar os carrís de adiantamento, mellorar o firme e corrixir varias curvas perigosas do actual trazado. Estamos falando dun eixo de mobilidade que entronca na actualidade a comarca de Valdeorras e o Oriente ourensá coa A-52 e coa estación de AVE da Gudiña”.
Así mesmo Dacosta considera que as melloras na OU-533 ”repercutirían de forma moi positiva no desenvolvemento económico, facilitando que os produtos melloren a súa posición nos mercados nacionais e internacionais”.