Dende Bad, Beat it ou Billie Jean, ata Smooth Criminal, Black or White ou Dangerous. Dende a súa primeira etapa nos Jackson Five ata os últimos anos. O público que na noite do venres 5 de agosto abarrotaba a praza da Estación, na Rúa, desfrutou dun completo, vistoso e animado percorrido polos mellores temas de Michael Jackson.
Ao longo de case dúas horas, a compañía Jackson Dance Company ofreceu sobre o escenario o seu espectáculo Michael’s Legacy, a primera homenaxe ao ‘Rei do Pop’ que ofrece o concepto que tiña o cantante nas súas xiras.
Cunha escenografía moi coidada, réplicas exactas das cancións orixinais e un toque especial dado pola compañía, cun gran corpo de baile formado por 9 bailaríns e grandes voces en directo, fixeron vibrar ao público transmitindo as mensaxes que Michael Jackson facía chegar en cada unha das súas actuacións.
O concerto de onte pola noite era un dos pratos fortes do programa das Festas de Verán na Rúa que continúan hoxe, con pasarrúas da charanga BB+ e baile a cargo da orquestra Funçao Públika en sesión de tarde e verbena.
Fotos e vídeos: Mónica G. Bellver.
