Con varios libros xa ás costas, entre os que destacan Un camino hacia Santiago ou Memorias de un pueblo, Luis Yáñez Abelaira (natural da Pobra de Trives e residente en Madrid dende 1962), está en plena promoción do seu novo traballo literario, unha publicación de máis de 800 páxinas que vía a luz hai uns oito meses, tras anos de lectura, investigación e recompilación.
Trátase de Reflexiones: 650 personajes importantes y famosos de la historia (ViveLibro, 2023) que como o seu nome indica, recolle “as reflexións máis soadas e famosas de personaxes notables da historia a través das súas frases, deixando constancia da súa forma de pensar e a súa visión da vida. As máis significativas que transcenderon ao longo da historia, ben pola repercusión ou o impacto que tiveron no seu momento ou pola influencia que exerceron na sociedade. Así mesmo especifícase a época en que viviron e o seu currículo na marxe da súa significación social, política ou relixiosa”, explica o propio Luis.
Tralas presentacións en Segovia e Soria, proximamente faráo na Casa de Galicia en Madrid, acompañado entre outros pola escritora Espido Freire.
Falamos con el durante a súa visita ao Barco de Valdeorras acompañado pola súa filla Teresa. Máis información sobre o libro e a traxectoria de Luis Yáñez, na edición en papel de setembro do Periódico O Sil.
Fotos e vídeo: O SIL.
