Salientable actuación dos atletas das Escolas Deportivas de Trives, que compiten coa camiseta do Club Adas Cupa do Barco no Trofeo Abanca de pista cuberta de categorías base, celebrado este domingo en Expourense. Así do equipo Sub10 masculino do Adas, que se proclamaba campión galego por clubs, formaban parte os triveses Nicolás Conde Nogueira e Nicolás Eduard Lascu.
No equipo Sub10 feminino do Adas, que lograba o subcampionato, estaba a trivesa Itziar Cid, e do equipo Sub12 masculino, que conseguía o título galego, tomaban parte Martín Rodríguez González e Antón Prieto Cortizo. Ademais, cabe mencionar o 5° posto do equipo Sub-12 feminino, no que estaba Deva Posada Domínguez e o título galego do equipo Sub-14, entre cuxos atletas estaba Marcos Basalo González.
“Foi outro día difícil de olvidar e unha gran alegría poder entrenar a estes atletas, nunca fallan”, resalta o seu adestrador, Tino Sierra, quen ademais agradece o apoio do Concello, así como e de pais, nais e dos nenos e nenas para poder levar adiante este proxecto deportivo.
Fotos cedidas.
