A C.R.D.O. Ribeiro vén de actualizar o rexistro de viñas, para así poder entregar unhas novas tarxetas aos viticultores. Os datos obtidos despois deste traballo revelan unhas 1 300 hectáreas en produción e uns 1 700 viticultores activos antes da vendima.
Estas novas tarxetas serán entregadas a partir de hoxe, día 24 de xullo, a todas as persoas que actualmente teñan viñas en produción dentro da D.O. e que pasaran polo Consello Regulador a actualizar o rexistro. Así, ningún viticultor poderá entregar uvas a ningunha bodega se non posúe esta tarxeta.
Ademais, como medida extra, o C.R.D.O. Ribeiro dará comezo no mes de agosto a unhas inspeccións de estimación de rendemento da colleita. Así, ofrecerase unha estimación máis real da próxima colleita, así como información das condicións actuais da uva.
