No mes de novembro de 2022 o Pleno de Petín acordaba darlle á praza situada na rúa Carreira, en pleno casco vello, o nome de ‘Aira do Juanon’ en memoria do veciño querido e coñecido por todos e falecido uns meses atrás.
Juan Martínez Blanco, máis coñecido como “Juanón”, era un gran embaixador de Petín, ata o punto de que no ano 2017 era o encargado de dar, en clave de humor e facendo rir a todos os presentes, o pregón desa edición da Feira de 1812. Por iso, a organización decidía acertadamente que fose a inauguración da súa praza a que marcase a apertura da X edición da feira que se celebra esta fin de semana ao longo do casco vello da vila, cheo de postos e oficios típicos do século XIX.
E así o facían no mediodía deste sábado 17 de xuño. Logo de ser aprazada pola ameaza de chuvia (a data inicial era a primeira fin de semana do mes), a cea popular celebrada no pavillón do teleclub onte pola noite, marcaba o inicio da X Feira de 1812 en conmemoración da Constitución de Cádiz, que se inauguraba oficialmente co descubrimento da placa co nome da praza.
Foi un acto sinxelo e emotivo que contou coa presenza de familiares, amigos e veciños, e as sentidas intervencións da alcaldesa de Petín, Raquel Bautista e Juan José Rodríguez que presentara a Juanón no pregón de hai seis anos, así como coa interpretación, a petición popular, do Himno de Petín.
A partir de ahí, ao longo da fin de semana os visitantes que se acheguen ata esta localidade valdeorresa poderán pasear, mercar, comer e beber nun ambiente festivo que nos traslada ao século XIX.
Fotos: Carlos G. Hervella e cedidas.
Vídeo: Carlos G. Hervella.
