Doce días despois de ser despedidos polo alcalde e o concelleiro de Deportes, os deportistas de atletismo e baloncesto que representaron ao Concello do Barco nos 15º Xogos do Eixo Atlántico, volvían ao Salón de Actos do edificio multiusos barquense, desta volta para recibir os parabéns e o recoñecemento oficial.
Os mellores resultados eran a delegación de atletismo. Sergio Fernández que lograba a prata en lanzamento de peso; Tania Peláez o bronce en 100 metros lisos; Aaron Pérez o ouro en 100 metros lisos; e o equipo formado por Mateo Valcarce, Saúl Crespo, Xoel Pungín e Lucas Valcarce, outro ouro en ruta. Un trofeo que Lucas entregaba ao Concello “porque este premio non é para o Adas Cupa senón para O Barco”, dixo Agustín González.
Tralos parabéns e palabras de agradecemento e ánimo en nome do Concello, Aurentino Alonso e Alfredo García entregaban orixinais medallas de galleta aos deportistas.
No caso da delegación de baloncesto, o equipo masculino chegaba a semifinais mentres que o feminino “facía moi bo papel pero caía antes”. Con todo, dende o Concello aproveitaban este acto para recoñecer tamén oficialmente a excelente tempada dos equipos júnior feminino e masculino do MV Barco, campión e subcampión na liga provincial de baloncesto, respectivamente.
Fotos e vídeo: Mónica G. Bellver.
