Á beira das montañas de Trevinca discorre o traxecto do Viacrucis da Serra, un singular conxunto escultórico ideado e creado por Pepe de Barrio, artista natural de Lamalonga (A Veiga). Décadas atrás esculpía as 15 estacións deste calvario, que se colocaban nun traxecto de 14 km entre o Alto da Portela e á entrada a Lamalonga.
Este percorrido relixioso cobraba vida por vez primeira, coa participación do propio artista, o Mércores Santo do ano 2000. Dende entón o Viacrucis da Serra, o máis alto de Galicia e un dos máis longos, continúa celebrándose cada Semana Santa grazas ao labor da Asociación de Cooperación para o Desenvolvemento de Lamalonga “Pepe de Barrio”, pero anos atrás pasou a súa data do Mércores ao Xoves Santo.
Na soleada tarde deste 6 de abril numerosas persoas reuníanse novamente no Alto da Portela para iniciar este traxecto relixioso no que se rememora a paixón e morte de Cristo. A súa chegada á derradeira estación, está prevista á noitiña en Lamalonga. Unha vez alí, a asociación ofrecerá chocolate quentiño aos asistentes.
Durante o percorrido contábase coa colaboración do Grupo Emerxencias Supramunicipal (GES) da Veiga.
Fotos e vídeos: Carlos G. Hervella.
