A veciñanza de Baxeles (Vilamartín de Valdeorras) reuníase ás 11h. deste mércores 13 de marzo co subdelegado do Goberno en Ourense, Emilio González, no Concello de Vilamartín para abordar as solucións á problemática de falta que comunicación telefónica que levan sufrindo dende hai dous anos. Tras a supresión do cobre pola fibra, quedáronse sen teléfonos fixos, “xa que aquí non colocaron a fibra e, no caso dos móbiles, non temos cobertura e para poder comunicarnos temos que saír á estrada”, tal e como lle explicaban os veciños ao Periódico O SIL.
“Estamos aquí para escoitar as demandas da veciñanza de Baxeles na reunión que imos ter a continuación. Valoraremos con eles e concretaremos as posibilidades de resolución que poida haber en canto a comunicación telefónica e tamén evidentemente de extensión de banda ancha e de fibra óptica. Explicaráselles polo miúdo cales son as posibilidades que teñen para contar, o antes posible, cunha comunicación”, dicía o subdelegado do Goberno, que acudía á xuntanza acompañado por un experto.
“Hai un obxectivo que é o de achegar a todos os núcleos rurais de España e da provincia, e a este tamén. a banda ancha. Dende logo a provincia de Ourense e a nivel de extensión de banda ancha a terceira de España. Deste problema tivemos coñecemento grazas ao alcalde e imos a intentar darlle a todos unha solución. O obxectivo do goberno é que o medio rural teña a mesma comunicación que os núcleos máis poboados e intentar romper esa brecha dixital para impulsar unha solución axeitada a todos os veciños o antes posible”, indicaba o subdelegado do Goberno, antes da reunión.
Nela tamén participaba o alcalde de Vilamartín, Enrique Álvarez, quen agradecía a visita a este municipio de González Afonso. “Grazas ao subdelegado do Goberno por atender a demanda do Concello, que responde á súa vez a demanda expresada pola veciñanza de Baxeles que están preocupados por unha situación que se vén alogando demasiado no tempo. Todos estamos preocupados porque a situación é complexa para eles polo feito de que hai xente maior que está sen cobertura e sen teléfono e que, dalgunha maneira, queren saber que é o que se vai facer dende o Concello e dende a adminsitración e entendemos perfectamente a demanda da veciñanza”, afirmaba o rexedor.
Fotos: Carlos G. Hervella.