A Xunta aposta pola “colaboración cos concellos para poñer en funcionamento os dous novos Grupos de Emerxencias Municipal (GES) da provincia de Ourense, aprobados o pasado novembro pola Comisión de Seguimento dos GES, da que forman parte o Goberno galego, as deputacións provinciais e a Federación Galega de Municipios e Provincias (Fegamp)”. Sinalábao esta mañá a directora xeral de Administración Local, Natalia Prieto; durante unha reunión sobre a posta en marcha dos dous novos GES da provincia: un con sede na Veiga e outro en Maceda.
Na xuntanza tamén estaban presentes o director xeral de Emerxencias e Interior, Santiago Villanueva; o delegado territorial da Xunta en Ourense, Gabriel Alén; e, por videoconferencia, o vicepresidente da Deputación de Ourense, Plácido Álvarez, e os alcaldes de Maceda, Rubén Quintas e A Veiga, Juan Anta, os dous municipios que acollerán as sedes dos novos GES.
O novo mapa de emerxencias para garantir unha maior e mellor cobertura en Galicia en situacións de emerxencia inclúe 5 novos GES na comunidade galega (os dous xa citados de Ourense máis outros 3 en Pontevedra) e un servizo municipal no concello coruñés de Noia, o que supón que a comunidade conte cun total de 29 GES e 4 servizos municipais.
A directora xeral de Administración Local explicou que para que os novos grupos poidan funcionar o antes posible, os concellos que serán sede dos novos GES deberán adherirse ao convenio de colaboración que se asinará entre a Xunta, as deputacións e a Fegamo e, de ser necesario, impulsar os procesos de selección para contratar os novos efectivos, que rematarán coa formación impartida na Academia Galega de Seguridade Pública (Agasp).
Para a proposta de localización dos novos grupos cos que mellorar e completar o mapa de emerxencias de Galicia, a Xunta tivo en conta “criterios técnicos para dar resposta á poboación da zona tendo en conta a situación de cada provincia, os GES non operativos trala renuncia dos concellos sede e as zonas sombra existentes logo de analizar as isócronas de cada servizo”, segundo a administración galega.
No caso da provincia de Ourense, o GES con sede en Maceda permitirá mellorar os tempos de reposta aos municipios de Maceda, Xunqueira de Espadañedo e Baños de Molgas e, ao mesmo tempo, atender aos concellos de Esgos, Paderne de Allariz e Vilar de Barrio, que ata agora dependían do GES de Pereiro de Aguiar. Ademais dos municipios anteriores, o GES de Maceda tamén atenderá as incidencias en Xunqueira de Ambía.
En canto ao GES con sede en A Veiga, que inclúe tamén aos municipios de O Bolo, Viana do Bolo e Vilariño de Conso, permitirá que “varios destes concellos sen servizos de emerxencias a menos de 20 minutos, agora dispoñan del”, segundo a Xunta.
Xunto coa creación dos GES con sede na provincia de Ourense, a Comisión de Seguimento aprobou crear outros 3 na provincia de Pontevedra e o servizo municipal no concello coruñés de Noia. En Pontevedra Arbo, A Cañiza, Covelo e Crecente serán atendidos polo novo GES da Cañiza; Cerdedo-Cotobade, Fornelos de Montes, A Lama e Ponte Caldelas, por outro con sede en A Lama; e Mos, Pazos de Borbén, Redondela e Soutomaior, polo GES Mos/Redondela, cunha base en cada un dos dous municipios.
A creación destes 6 novos grupos suporá un incremento do investimento por parte da Xunta duns 300.000 euros ata os 4,8 millóns de euros, máis da metade do custo anual dos GES.
