Un numeroso grupo de estudantes do IES As Lagoas de Ourense percorría esta semana os escenarios da novela “A boca do monte”, acompañados de Celia Díaz Núñez, a autora desta obra, publicada pola editorial Galaxia. Nela recréase a construción do túnel de Montefurado (Quiroga) no século II, en tempos do emperador Traxano, para recoller o ouro que o Sil arrastraba ao seu paso.
A ruta iniciouse en Rairos, ao pé do Castro de Ares, punto onde comeza e remata a novela, e continuou ata o túnel de Montefurado, coñecido popularmente como a “Boca do monte”, onde o alumnado puido contemplar o inmenso oco aberto na montaña e que representa un dos grandes logros da enxeñería romana. O percorrido continuou por Augasmestas e as Covas do Medo de Margaride, lugares que teñen tamén presenza na ficción literaria de Celia Díaz.
En cada punto do itinerario os estudantes coñeceron os aspectos históricos que sustentan a trama e leron fragmentos significativos da novela localizados neses mesmos escenarios.
“Literatura e historia danse a man e achegan aos estudantes un patrimonio xeográfico e histórico de extraordinaria importancia”, destaca a autora deste libro.
Fotos cedidas por Celia Díaz.