“Que haxa un goberno do BNG na Xunta de Galicia vai supor ter un goberno que mire polas zonas rurais e de interior, que non nos deixe no abandono e que promova que estes territorios pesen”. Así o destaca Secundino Fernández Fernández, número catro da lista do BNG pola provincia de Ourense, enxeñeiro de Montes e técnico agrícola, que foi alcalde de Viana do Bolo e hoxe é concelleiro na corporación deste municipio. Malia que xa foi noutra ocasión nunha lista nas eleccións galegas, esta a primeira vez na que o fai en postos de saída e ademais coa sensación de que se perciben ganas de cambio e que este é posible. “Estas eleccións teñen unha compoñente histórica porque hai dende logo a posibilidade real, que dan todas as enquisas e que tamén nos dá a cidadanía, de que poidamos ter un goberno do BNG na Xunta por primeira vez na historia e encabezado por unha muller, Ana Pontón. Co tal todas as persoas que imos na candidatura e o conxunto da militancia do BNG están cunhas ganas de traballar e cunha mobilización incrible. Vemos esa posibilidade histórica de estar neste lugar e neste momento e cremos que vai ser un momento para o recordo para que o que vai supoñer”.
Secundino Fernández, que vén a representar na lista ás comarcas e Monterrei e Viana do Bolo, pon o foco no que pode supoñer ese cambio no goberno galego para o interior galego e, máis en concreto, para o rural ourensán. “Tan só hai que dar uns pequenos datos para ver como está a situación. Nos quince últimos anos do goberno do PP a provincia de Ourense perdeu o equivalente a tres vilas en poboación, é como se desaparezan dun plumazo O Barco, Verín e Celanova, por exemplo. É dicir, perdéronse 30.000 persoas. Fronte a iso o BNG presenta o Plan Ourense Vivo, que pretende corrixir esa desproporción que hai en Galicia entre as zonas da costa e a do interior. Ese plan de reequilibro territorial contempla a Axencia Territorial Galega que vai estudar todas as eivas e aplicar á parte interior medidas correctoras. Dende logo non podemos seguir perdendo explotacións agrarias, non pode seguir desaparecendo o medio rural, non baixar a poboación das cabeceiras comarcais… E todo iso é froito dun abandono sistemático dos servizos públicos que tivo o PP”.
Con respecto a esa perda de servizos, o candidato do BNG fai fincapé en que a sanidade da provincia de Ourense “é a de peor calidade de todo o país, os servizos sociais desaparecen, o transporte, a actividade agraria, os sectores agrogandeiros, todo iso é un conxunto de actuacións que fixo o PP de abandono do país, que no interior resulta moito máis acusado. Por iso nese reequilibrio territorial é no que temos que facer dende o BNG e temos que traballar en todos eses servizos públicos para poder reverter esa situación”.
Nese senso, o candidato nacionalista menciona unha serie de propostas do BNG de cara a impulsar o rural, matizando que “o medio rural hai que tomalo hoxe como un conxunto, tendo en conta que hoxe nel viven moitas persoas que non traballan nos sectores agrarios, e impulsando políticas directamente vinculadas á produción agrogandeira, pero tamén coa necesidade de facer outras están vinculadas ao territorio, como por exemplo, as de crear espazos atractivos para a poboación mellorando infraestruturas e servizos, a mobilidade, recuperar vivendas ou por exemplo, apoiar a actividade non agraria en zonas rurais. Nesa liña unha medida estrela nese senso é o tícket rural de 15.000 euros ao ano para os negocios que se establezan”.
Pero Secundino Fernández resalta que “sen sector agrario é imposible que se manteña o medio rural, este sería o sector fundamental. E aí básico que os produtores teñan uns prezos que realmente lles permitan vivir da súa actividade, por iso imos recuperar os contratos homologados que se estableceron no viño e que o PP eliminou no 2009. Ademais hai que aplicar a Lei de Cadea Alimentaria para que non se poida vender a perdas. Neses aspectos, que son moi importantes, a Xunta de Galicia dende logo pode actuar e debe actuar”. Outra medida, prosegue o candido do BNG, sería “eliminar esa burocratización da que tanto se queixa o sector, todos estes trámites, debe adaptarse toda a realidade da PAC ao noso país. E temos que darlle máis contido ás oficinas rurais para que poidan axudar aos produtores a facer todo o que é burocracia, como se facía antes. Esas oficinas foron eliminadas paulatinamente para que todo o teñan que facer directamente as persoas e os agricultores”.
Outra cuestión que Secundino Fernández considera fundamental para impulsar o rural é o apoio á “recuperación das terras agrícolas, non podemos ter esa cantidade de terras agrícolas tan grande abandonada. Son miles e miles de hectáreas que mesmo son pasto dos lumes cada determinado tempo, entón temos que actuar aí a través do banco de terras para poñer esas fincas en produción, non podemos ter un país cun 21% de superficie agraria útil, cando no estado español é o 43%. Esas tamén son políticas da Xunta”. Así mesmo, o candidato do BNG menciona a importancia de promover os “ciclos curtos, os mercados locais, ademais de favorecer que todos os sitios nos que a administración poida actuar, dende comedores de hospitais ata comedores de colexios, teñan produtos galegos e locais nos seus menús”.
Neste conxunto de cuestións, incide Fernández, “ten que actuar a Xunta porque son as políticas do noso país e ademais posúe as competencias para facer todo isto no ámbito agrario”, por iso pide o apoio para o BNG. “Nós non podemos seguir nesta situación, a Galicia interior e a Galicia rural non pode seguir nesta situación porque vai cara un punto de non retorno”.
