O Concello de Allariz, a través da Concellería de Promoción Económica, Comercio e Turismo, vai organizar o primeiro Mercadiño do Libro Vello, co obxectivo, din, da dinamización cultural do casco histórico durante a Semana Santa
Este Mercadiño literario vaise celebrar na Praza Maior e na Praza de Abaixo de Allariz o sábado 15 de abril, en horario de 11:00 a 20:00 horas. Dende o consistorio informan que todos os interesados a título particular poderán participar no mercado, sempre e cando sexan maiores de idade. Os participantes poderán vender e expoñer os seus produtos “sempre que se trate de artigos de segunda man”, explican. Ademais, reservarase un número de postos definido para librarías ou tendas de música que desexen expoñer os seus produtos descatalogados.