Esta mañá tiña lugar en Muxía a entrega de distintivos Q e S de Calidade Turística 2024 da Axencia de Turismo de Galicia. Este ano entregáronse 53 novas distincións “Q” de Calidade e 39 “S” de Sostibilidade. Actualmente, Galicia é a segunda comunidade autónoma con máis distintivos Q e a cuarta de distintivos.
Entre os que recibían a Q de Calidade Turística no Parador de Muxía estaba o Concello de Trives, representado pola súa alcaldesa, Patricia Domínguez, e polo concelleiro de Cultura, José Luis Vidal. O distintivo, outorgado polo Instituto para a Calidade Turística Española, “converte A Pobra de Trives, a través da súa Oficina de Turismo, no único Concello da provincia de Ourense que actualmente dispón desta distinción, que si teñen establecementos privados como restaurantes ou balnearios”, segundo asegura o Concello Trives.
O acto estivo presidido polo presidente da Xunta de Galicia, Alfonso Rueda, quen reafirmou o compromiso do seu Executivo no apoio ao sector turístico galego e felicitouno por estar contribuíndo a reforzar a calidade do destino e, deste xeito, facelo, ademais, máis atractivo para os viaxeiros.
