Debuxos, gravados e bosquexos, realizados exclusivamente en branco e negro ao longo de oito décadas de produción; pero tamén unha serie de deseños da súa etapa como mestre colorista na factoría de tecidos Guggenheim & Sons en Zürich, en 1958. Son os eixos en torno aos que xira a exposición “Esencial”, que pretende achegar ao público á figura do creador barquense Jesús Díaz Ferrer (1922 O Barco-Concud, Teruel, 2017), no marco do centenario do seu nacemento. A súa inauguración está prevista para o vindeiro venres 20 de maio na sala de exposicións Abanca no Barco.
Esta mostra, organizada pola Concellería de Cultura do Concello do Barco, estará aberta nesta sala ata o 18 de xuño, e poderá visitarse de luns a venres, de 19 a 21 horas, e os sábados de 12 a 14 horas. Está comisariada polo tamén barquense Luís Enrique Rodríguez Arias “Coquixo”, revisa os fondos privados do artista, as súas obras e bosquexos. “Tratouse de deixar patente que nos atopamos ante un artista que, por ter transitado durante a súa longa carreira dende as derradeiras vangardas europeas ata a postmodernidade, resulta “Esencial” para comprender os nexos entre a arte galega e a arte europea dende mediados do século XX ata os inicios do século XXI”, sinala Coquixo.
O seu contido está estruturado en dúas partes ben diferenciadas, unha delas inclúe 48 cadros en branco e negro de diferentes etapas, temáticas e estilos, abranguendo un lapso de tempo de 70 anos. A segunda, correspóndese con deseños da colección persoal de Díaz Ferrer, na que desenvolveu ideas e efectos baseados na cor para tecidos.
“A liberación do soporte plano do lenzo deulla a oportunidade de pescudar no mundo do cromatismo como nunca antes o fixera. Desenvolveu ideas previas e mergullouse noutras novas, supoñendo neste senso unha etapa crucial para a súa arte posterior”, resalta Coquixo. Dese xeito, “a combinacióin harmónica de cor e branco e negro e das distintas “esencias” presentes na obra de Díaz Ferrer, déronlle o verdadeiro sentido a este proxecto expositivo”, asegura o comisario.
“A idea é que a exposición se presente noutras cidades de Galicia, ata o mes de decembro deste ano”, adiantan dende o Concello do Barco.
