Na noite do venres 28 de xullo producíase un accidente de tráfico no municipio ourensán de Piñor no que resultaba falecida unha muller, tal como indican dende o 112 Galicia, explicando que “o choque frontal entre a furgoneta e o camión produciuse na AG-53, no punto quilométrico 63”. Un dos alertadores ao 112 Galicia dixo que “un dos vehículos implicados ía en dirección contraria” e como consecuencia do impacto, “a condutora da furgoneta e única ocupante do vehículo faleceu, mentres que o camioneiro resultou ileso”.
Así o confirmaban os equipos de emerxencias e sanitarios, que se desprazaron ao lugar tras recibir a alerta no 112 Galicia arredor das 23:30 horas. “As chamadas de varias persoas ao número único de emerxencias posibilitaron a posta en marcha dun operativo de rescate e atención aos feridos. De feito, acudiron os Bombeiros do Carballiño, xa que a vítima estaba, ademais, atrapada no interior da furgoneta, e os profesionais de Urxencias Sanitarias de Galicia-061, que só puideron confirmar o falecemento”, din dende o 112.
Tamén contaron coa colaboración dos voluntarios de Protección Civil da vila e interviñeron os axentes da Garda Civil de Tráfico co fin de reunir todos os datos do sinistro. Ademais “foi necesario efectuar a limpeza da vía para retirar os danos e restablecer as condicións de seguridade, por iso, foron informados os equipos da Axencia Galega de Infraestruturas”, conclúen dende o 112 Galicia.