Na mañá deste 2 de abril, Venres Santo, teríase que ter celebrado na parroquia de Santo Estevo (A Rúa) a tradicional Procesión do Encontro coas imaxes de San Xoán, da Virxe e de Xesús Nazareno xuntándose na praza César Conti, pero a situación sanitaria tampouco o permitiu.
O ano pasado, en pleno confinamento, nin sequera se celebraron os cultos. Este ano, pola contra, sí está habendo celebracións pero todas no interior das igrexas, coas medidas de hixiene pertinentes e o aforo reducido. Así, ás once desta mañá de Venres Santo os fegreses asistían á celebración do Vía Crucis.
E xa pola tarde, a partir das 18h. terán lugar os Oficios da Paixón do Señor e o tradicional Desencravo, que se levará a cabo con todas as medidas anticovid.
Mañá, Sábado Santo ás 19:30h. rendirase culto á Soidade; e o Domingo de Resurrección á misa solemne de Pascua será ás 12 horas.
Fotos: Mónica G. Bellver.
