Os alumnos do ciclo medio de Xestión Administrativa e do ciclo superior de Administración e Finanzas do IES Loureiro Olmo do Barco realizaron unha visita institucional de dous días a Madrid, onde puideron coñecer de primeira man diversos organismos públicos como o Tribunal Constitucional, o Congreso dos Deputados e o Senado.
No Congreso dos Deputados recibiron explicacións sobre a historia da Cámara Baixa e puideron coñecer algunhas das salas máis emblemáticas, como o salón de conferencias ou de pasos perdidos, o vestíbulo e o hemiciclo. No Senado puideron ver o antigo salón de sesións, os despachos de honra da presidencia, o salón de conferencias ou a biblioteca, ademais de obter información sobre a historia da cámara e os cadros expostos nela. No Tribunal Constitucional o percorrido centrouse na primeira planta, que alberga o hall central, o salón de actos, a sala de visitas, a biblioteca e diversos obxectos históricos relacionados coas últimas constitucións da historia de España. “Tamén lles explicaron como estaba organizado o edificio a través dos seus sete plantas, así como as funcións do propio Tribunal”, explican dende o instituto barquense.
Ademais destas visitas, relacionadas con parte do contido dos ciclos de Administración, tamén tiveron tempo para facer turismo e descubrir algúns dos lugares máis emblemáticos da cidade, como a Praza Maior, a Porta do Sol, a Gran Vía, a Porta de Alcalá, o Palacio Real ou o Parque do Retiro.
O departamento de Administración espera “poder seguir realizando actividades deste tipo, que conecten os contidos estudados na aula coa realidade institucional e empresarial”. Así, o 14 de maio, dentro do programa de EduTecEmprende, realizarán unha visita á empresa Torre de Núñez de Lugo. Innovación educativa e emprendemento para os alumnos de Valdeorras.
Fotos cedidas
