A conselleira de Infraestruturas e Vivenda, Ethel Vázquez, e o alcalde de Sarreaus, Gumersindo Lamas, asinaron hoxe, 4 de xaneiro, o convenio de colaboración para a urbanización da praza Diagonal e as rúas da contorna, cun investimento autonómico de case 162.000 euros.
Este proxecto ten como obxectivo reformar a citada praza e as rúas da contorna, en pleno centro de Sarreaus, xa que a súa pavimentación se atopa “moi deteriorada”, sinalan dende a Xunta. Así, os traballos centraranse no arranxo dos desniveis, fochancas e gretas co fin de aportar maior seguridade e comodidade aos veciños que transitan a diario por estas rúas.
As actuacións a realizar consistirán na demolición do pavimento de cemento existente, na carga e transporte dos escombros para o seu tratamento, e na colocación do pavimento, que será de lastra en pedra, para o tránsito exclusivo de peóns, e outro en base de lastra de formigón para uso mixto. Tamén se instalará un sumidoiro para a recollida de augas pluviais na calzada.
O Goberno galego, con este tipo de actuacións, ten entre os seus obxectivos, din, a mellora da rede viaria da comunidade e a ordenación do territorio e a súa cohesión, de xeito que se proporciona aos cidadáns unhas estradas eficaces, fomentando o desenvolvemento económico e social.
A Xunta, a través da Axencia Galega de Infraestruturas, asume o compromiso de financiar a actuación, coa achega da totalidade do investimento preciso para executar o proxecto.
O Concello de Sarreaus levará a cabo as actuacións necesarias para a correcta execución das obras e comunicará á Axencia Galega de Infraestruturas a data de recepción dos traballos.
