Santiago acollía o 23 de xuño unha xornada para explicar as vantaxes de contar co marchamo de Galicia Calidade no sector turístico, así como os requisitos para poder obtelo. Estaba organizada pola Consellería de Economía e Industria, a través de Galicia Calidade, Turismo de Galicia e o Clúster do Turismo.
O acordo que veñen de asinar estas entidades busca incorporar antes de que remate o ano 2015 dez novos establecementos a este selo. Á hora de outorgalo teranse en conta valores arquitectónicos, medioambientais, paisaxísticos, culturais e gastronómicos galegos, esixindo ademais a presenza de produtos de orixe galega nos establecementos recoñecidos.
A presentación da xornada corría a cargo da directora de Turismo de Galicia, Nava Castro, pero tamén interviña nela o presidente do Clúster de Turismo, Francisco González, quen sinalaba que “coa sinatura do convenio demos o primeiro paso e hoxe podemos anunciar que o sector turístico conta xa cun marco de xeral cumprimento para poder integrarse dentro de Galicia Calidade”. Asemade participaban neste foro a a directora xeral de Comercio, Sol Vázquez, e o xerente de Galicia Calidade, Alfonso Cabaleiro.
