Tarde de música e convivencia a vivida este sábado 16 de novembro en terras leonesas polo Orfeón Trivés, un dos convidados pola Capilla de la Divina Comedia á X edición do certame ‘Otoño Coral Villa de Bembibre’, celebrado na Igrexa de San Pedro, en Bembibre.
Tal como explica a directora do Orfeón Trivés, Sandra González, nesta ocasión interpretaron Ubi Cáritas, Te Quiero, Viva la Montaña, Torrevieja, Ruada de Chamosa e Negra Sombra, ademais de O Sacrum de forma conxunta cos anfitrións.
Pola súa banda a coral Capilla de la Divina Comedia, dirixida por José Ramón Mansilla, interpretou tres obras ademais de O Voso Galo co outro coro convidado, a Coral Polifónica de Berres de Pontevedra, e O Sacrum co Orfeón.
Fotos e vídeos cedidos.
