Na tarde deste mércores 5 de febreiro, o director de Turismo de Galicia, Xosé Manuel Merelles, inauguraba no espazo cultural WeGil (Tratevere) da rexión de Lazio, en Roma, a exposición que leva por título ‘Camiño de Santiago, primeiro itinerario cultural europeo’, promovida pola Federación Europea do Camiño de Santiago e a Asociación Europea da Vía Francíxena.
Precisamente, a inauguración desta mostra enmárcase na viaxe institucional a Roma do presidente da Xunta, Alfonso Rueda, que ten como obxectivo a intensificación das relacións entre o Camiño de Santiago e a Vía Francíxena, que se ratificará coa sinatura de memorando de colaboración entre a rexión de Lazio e o Goberno galego para a proxección das dúas rutas de peregrinación.
Durante a súa intervención, Merelles salientou que “os itinerarios de peregrinación a Roma e Compostela constitúen unha rede de cultura e espiritualidade que reforza a identidade de Europa”. Referíndose aos dous roteiros, o Camiño de Santiago e a Vía Francíxena, destacou que “son sinónimo de concordia, tolerancia, entendemento e coñecemento dos pobos, valores polos que vela o Consello de Europa”. Neste sentido, lembrou que a ruta xacobea foi declarada en 1987 como primeiro Itinerario Cultural Europeo, un recoñecemento tamén outorgado en 1994 á Vía Francíxena.
O director de Turismo de Galicia engadiu tamén que son “instrumentos poderosos de globalización e de desenvolvemento económico dos territorios, onde floreceron distintas e diversas actividades produtivas, creceron as cidades e proliferou a arte e a cultura”.
A exposición inaugurada en Roma está composta por 30 fotografías que reproducen distintos tramos do itinerario a Compostela onde destaca sobre todo o patrimonio natural e arquitectónico dos lugares que atravesa. Todas elas son imaxes dos territorios europeos que forman parte da Federación Europea do Camiño de Santiago: rexións, provincias, comunidades autónomas e concellos de Polonia, Ucraína, Lituania, Croacia, Italia, Países Baixos, Bélxica, Francia, España e Portugal.
