O prometido é débeda e tal como avanzaba o presidente, a festa do ascenso do CD Barco será por todo o alto, por toda a vila e ao longo de todo o día.
Será este domingo 18 de maio e comezará coa ofrenda do título ligueiro a Santa Rita durante a misa das 12:30 horas. De seguido comezará na praza Maior unha sesión vermú na que percorrerán varios bares onde haberá pinchos.
Xa pola tarde, a partir das 16 horas irán de ronda polos distintos bares da vila e ás 17:15 horas chegará o momento da Ruada do Campión. “O equipo percorrerá as rúas do Barco ao ritmo da música dos Dj Karayan e Dj Dani Argü”, avanzan dende o club.
E xa cara as 19 horas, para rematar este fermoso día “fin de festa polos distintos bares ata que o corpo aguante”, avanzan ilusionados e con ganas de compartir o triunfo con toda a poboación.
