Entre os asuntos que se poñían sobre a mesa na sesión plenaria ordinaria que a Corporación do Barco celebraba a tarde do 4 de abril estaba a situación que presenta o Pavillón Vello, situado no centro da vila. O tema abordábao a concelleira do BNG, Noa Fernández, no apartado de rogos e preguntas.
A edil comentaba que, “en base ás diferentes normativas que regulan as instalacións deportivas municipais, establécese que o obxecto fundamental das mesmas é a tutela da saúde pública a través do fomento da educación física, facilitando a acaída utilización do ocio, debendo para elo de dispoñer de instalacións e equipamentos deportivos en boas condicións de uso que garantan a protección da saúde e seguridade. O Barco conta con instalacións, dúas delas fundamentais e que non garanten este dereito á saúde, senón que máis ben poden poñela en perigo. Non me vou referir ao pavillón de Calabagueiros ao que o concelleiro do PP, José Luis Tamayo, xa ten referido en diversas ocasións a el, e déronse aquí certas explicacións, pero o que non se dá é atallado o problema. Neste caso refírome ao Pavillón Vello”.
E mentres interviña, Noa Fernández amosaba diversas fotografías que lle facían chegar usuarios destas instalacións, “onde se pode ver as condicións nas que está o chan. Ao facer deporte é moi fácil tropezar e caer, entón queremos rogar ao Concello a reparación urxente destas instalacións nas que se desenvolven diversas actividades deportivas, tanto de menores como adultos e que, son un eixo fundamental da vida da nosa vila e non podemos permitir que estean nesta situación”.
O alcalde, Alfredo García, respondía que se tomaba nota do exposto e que “iremos a velas. Xa está previsto intervir, pero en calquera caso tomamos nota do dito”.
Fotos cedidas.