No marco da XXII Festa do Botelo do Barco, na tarde do venres 19 de xaneiro estreábase no Teatro Lauro Olmo, Run Baby Run, obra escrita pola valdeorresa Fátima Delgado e dirixida por Jana Pacheco.
Nesta obra Fátima Delgado elabora unha reflexión sobre a discriminación de xénero dentro do deporte feminino que viu a luz logo das súas investigacións de varios casos de mulleres deportistas profesionais. A trama de Run Baby Run sitúase uns meses antes dos Xogos Olímpicos, cando Alba, unha atleta de éxito que acaba de gañar un mundial, é apartada da competición oficial por un feito inesperado e experimenta como se derruba o seu mundo. Acompañada pola súa inseparable adestradora, a deportista verase nunha encrucillada na que loitará por cumprir o seu soño sen renunciar ao seu verdadeiro ser.
O papel da atleta está interpretado por Alba Loureiro e o da adestradora, por Camila Bossa. O elenco complétase con Celina Fernández e Daniel Méndez, e a canda eles atópase un equipo artístico integrado por figuras senlleiras das artes escénicas, como o deseñador Pier Paolo Álvaro, Fernando Epelde en calidade de responsable da música e do espazo sonoro da peza, o escenógrafo Alessio Meloni, o iluminador Juan Gómez Cornejo ou a coreógrafa Greta García, entre outras.
Trala representación, que tivo moi boa acollida por parte do público, a propia autora subía ao escenario para saidar aos actores.
Hoxe volveremos ver a Fátima, desta volta na súa faceta de presentadora, conducindo o acto do pregón da festa.
Fotos cedidas.
