Arredor dos valores científicos, da creatividade, do enxeño e tamén da posta en valor da ciencia en feminino xiraba a XXIV Convivencia de Educación Infantil “Cholo e Nela”, que se desenvolvía na mañá deste 28 de maio no CEIP Manuel Respino da Rúa.
O seu lema era “Ciencia e Conciencia” e reunía a medio milleiro de cativos de centros do oriente ourensán e tamén dun colexio de Cubillos del Sil (León). Durante o curso traballaban ao redor dunha unidade didáctica elaborada por un grupo de mestres e mestras e que tivo como protagonistas a dous personaxes de ficción, Cholo e Nela. Trátase dunha pinga de auga do río Sil e un globo do País da Fantasía que lles achegan á rapazada o valor e respecto polo medio, desde o lecer e desde o galego.
O programa da convivencia incluía multitude de propostas divulgativas, educativas e tamén lúdicas cunha serie de actividades distribuídas en diferentes zonas: obradoiros, contacontos, exhibicións das forzas e corpos de seguridade e de emerxencias, así como inchables e colchonetas, ademais de música.
Fotos: Carlos G. Hervella.
