O programa da I Festa do Viño Gallego, que se celebrará os días 5, 6 e 7 de xullo con participación de adegas valdeorresas, presentábase esta mañá na azotea do centro comercial A Laxe de Vigo. O evento, que promete converterse nunha referencia para os amantes do viño, ofrecerá unha experiencia única con vistas privilexiadas ás Illas Cíes. O acto de presentación contou coa participación de David Regades, delegado da Zona Franca de Vigo; a xerente do centro comercial A Laxe; o concelleiro Ángel Rivas; e Ernesto Andrés Malga, xerente de Vigoplan, a empresa organizadora do evento.
A festa desenvolverase na gran azotea da Laxe e reunirá viños de todas as Denominacións de Orixe de Galicia. Con entrada gratuíta e un aforo rotativo de 560 persoas, o evento busca ofrecer unha experiencia inclusiva e accesible. Desde as 12 do mediodía ata as 12 da noite, cada xornada contará con actuacións musicais en directo e diversas actividades como catas guiadas. Unha das principais atraccións será a barra longa de degustación, onde se servirán todos os viños participantes. Cada Denominación de Orixe terá a súa propia sinalética diferenciada dentro dun decorado homoxéneo.
Entre as adegas participantes atópanse Viña Costeira, Adegas Galegas, Veiga Serantes, Adegas HGA, Adega Cachín, Martín Códax, Ladairo, así como as valdeorresas Godeval, Joaquín Rebolledo e Adega Santa Marta.
Para aqueles que busquen relaxarse, haberá zonas de descanso chill out, deseñadas para gozar do ambiente festivo. Ademais, os asistentes poderán deleitarse con concertos en vivo de artistas locais como Ariadna Santana, Pablo Vila e Los Tripulantes, Delta Blues, Mala Herba, El Trío de Jack, e Barros e Mayobre. A ambientación musical será complementada por DJs locais que engadirán un toque dinámico e cheo de enerxía.
O evento tamén contará cunha zona gastronómica onde se poderán degustar produtos típicos galegos, como polbo, ibéricos, conservas, hamburguesas, pizzas e doces. Para facilitar as transaccións, implementarase un sistema de cobranza mediante QR. Os amantes do viño poderán gozar dunha zona VIP con catas especializadas, guiadas por un profesional do sector, que ofrecerá unha experiencia máis íntima para explorar os matices e sabores dos viños galegos.
Ángel Rivas, responsable da área de Goberno de Parques e Xardíns, Comercio, Participación Cidadá e Festas Especiais, subliñou a relevancia desta celebración. “Estamos convencidos de que será un éxito rotundo. Desde o goberno municipal seguiremos apoiando estas iniciativas. Facemos un chamamento non só aos vigueses, senón tamén á comarca, a Galicia e ao norte de Portugal para que se unan e gocen dos nosos produtos.”
David Regades, pola súa banda, expresaba a súa confianza no evento. “A festa do viño será o impulso definitivo para converter estas terrazas no punto de encontro da cidade. Desde aquí, a través da pasarela, estamos no corazón da nosa cidade, co cal facer este evento aquí é facelo no corazón de Vigo e facelo no corazón de Vigo é facelo no centro da economía de Galicia.”
Ernesto Andrés Malga, xerente de Vigoplan, expresou o seu entusiasmo polo evento. “Queremos que esta festa sexa unha homenaxe á riqueza e diversidade dos viños de Galicia, e unha oportunidade para que todos os asistentes descubran e gocen dos nosos produtos nunha contorna espectacular.”
Ao termo da presentación, os asistentes puideron gozar dunha degustación dos viños participantes, acompañados de xamón de Ibergal.