Co respaldo da maioría absoluta que o PP ten no Parlamento galego, Alfonso Rueda vén de ser elixido presidente da Xunta por segunda vez na sesión plenaria que se celebraba esta tarde no Hórreo. A súa candidatura lograba os 40 escanos do grupo popular, mentres que o BNG e o PSdeG (o que sumados supón 34 votos) votaban en contra e o único deputado de DO, abstíñase.
Rematado o escrutinio, o presidente do Parlamento, Miguel Ángel Santalices Vieira, proclamaba presidente da Xunta de Galicia a Alfonso Rueda Valenzuela. Deste xeito concluía unha sesión de investidura que comezaba o pasado martes.
O presidente do Parlamento comunicará a elección á súa maxestade El-Rei, para o nomeamento de Alfonso Rueda Valenzuela como presidente da Xunta, conforme ao disposto no artigo 18 da Lei 1/1983, do 22 de febreiro, reguladora da Xunta e da súa Presidencia.
O referido artigo sinala: “Se o Parlamento outorga a súa confianza ao candidato, o presidente comunicarao a El-Rei para o seu nomeamento, mediante Real Decreto que se publicará no Boletín Oficial del Estado e no Diario Oficial de Galicia“.
A comunicación -un documento con sinatura electrónica– enviarase esta mesma tarde por medios telemáticos.
