No Parque San Domingos de Bonaval, en Santiago, Alfonso Rueda Valenzuela tomaba posesión, por segunda vez, como presidente da Xunta de Galicia. Xuraba o seu cargo asegurando que “tomo posesión como primeiro servidor de Galicia. Fágoo para achegar o meu modesto gran de area á gran tarefa que outros iniciaron e outros continuarán”. O líder do PP era elixido presidente na tarde do xoves no Parlamento galego cos votos da maioría absoluta do seu partido.
Entre os asistentes a este acto estaban tres ex presidente da Xunta de Galicia: Fernando González Laxe, Emilio Pérez Touriño e Alberto Núñez Feijóo. Antes da toma de posesión, Rueda facía, xunto a eles, unha ofrenda floral na tumba de Castelao no Panteón de Galegas e Galegos Ilustres, na igrexa adxacente.
