No mesmo escenario no que se desenvolverá en apenas uns días, na praia fluvial do Malecón do Barco, a organización do SilFest Valdeorras presentaba os contidos da sétima edición deste evento, previsto do 13 ao 15 de xullo. Neste acto participaban, ademais de dous representantes da organización, Aida Estévez e José Carlos Vilor; o alcalde do Barco, Alfredo García; a concelleira de Cultura, Margarida Pizcueta; e, en representación de Turismo de Galicia, Cecilio Santalices.
O cartel deste 2023 incluirá ata 16 bandas de renome no paronama nacional e galego, tal e como destacaba Aida Estévez: Ángel Stanich, Joe Crespúsculo, Niña Polaca, Alberto & García, Fillas de Cassandra, Yoly Saa, Luis Fercán, Joana Serrat, The Gulps, Whisky Caravan, Casino Montreal, Capital Voskov, Adrian Timms, Señora Dj, Dj Lagartija e Hawkins Dj. A elas súmanse os artistas do Mini SilfFes, con espectáculos para a cativada: Pakolas e Javier Becerra.
“Imos xa pola sétima edición deste festival que consideramos que é moi importante para O Barco e tamén para Valdeorras, cun programa que achega propostas para todos os públicos e de referencia a nivel galego e mesmo español. Estamos moi en contacto con outros festivais e vemos que toda a xente que vén, repite. Nesta edición, novamente, imos dalo todo e pensamos que contamos cun bo cartel, para que desfrute todo o mundo”, indicaba Estévez, adiantando que o programa completo de actos se publicará esta tarde nas redes sociais do festival.
Ao longo de tres xornadas o público gozará, ademais dos concertos, de catas de viño da Denominación de Orixe Valdeorras, de gastronomía incluíndo iniciativas como un showcooking, actividades na natureza e nun entorno único polo que discorre o Camiño de Inverno.
Tanto Aida Estévez como José Carlos Vilor agradecían o apoio das institucións (Concello, Deputación e Xunta) para levar adiante o festival, así como o patrocinio de diversas empresas de Valdeorras, “que sempre nos apoian. Isto facémolo para a xente de Valdeorras para que poidan vir a desfrutar e tamén para achegar aos máis pequenos ao mundo da música”, por iso animaban á ao publico “a participar e implicarse no SilFest”.
Nese mesmo chamamento insistían tanto a concelleira de Cultura do Barco como o alcalde, indicando que o SilFest “é o mellor impulso non só para a cultura, senón tamén para a economía e o turismo da zona”. Finalmente, en representación de Turismo de Galicia interviña Cecilio Santalices, quen destacaba que este é “un festival familiar, que vai dirixido a todos os públicos e que se celebra nunha paraxe excepcional. Dende Turismo de Galicia apostamos por esa diversificación e tamén pola posta en valor do Camiño de Inverno, polo turismo, o enoturismo e a gastronomía”, liñas que fan singular tamén a este evento. Santalices tamén engadía que estaba convencido de que esta edición “vai ser un éxito”.
Fotos: A.R.