Veñen de iniciarse os traballos para realizar o inventario forestal continuo de Galicia. O primeiro paso foi a sinatura dun convenio de colaboración entre a Consellería do Medio Rural, a Universidade de Santiago de Compostela e a Universidade de Vigo para o desenvolvemento deste documento. Agora vén de celebrarse a primeira xuntanza da comisión mixta, onde se atopan representantes de todas as entidades asinantes. O encontro, mantido a través de videoconferencia, estivo presidido polo director xeral de Planificación e Ordenación Forestal, José Luis Chan.
Nesta primeira xuntanza revisáronse as principais tarefas programadas para este ano 2020, moitas delas relacionadas coa metodoloxía que se implementará para o inventario, especialmente na determinación de estratos e variables principais, así como o desenvolvemento da infraestrutura de datos, metodoloxía de clasificación e sistema de detección de cambios.
O obxectivo final deste traballo é, “por unha banda, facer o seguimento da cantidade e do estado das masas arboradas, e por outra, crear unha estratexia de apoio ás decisións en materia de política forestal mediante un sistema de monitorización forestal continuado. O orzamento total para o desenvolvemento deste convenio ascende a algo máis de 640.000 euros, dos cales case 574.000 serán aportados pola Consellería e outros 68.000 polas universidades”, informa Medio Rural.
As funcións desta comisión de seguimento son: exercer a co-dirección do convenio e velar polo cumprimento do convenio, propoñer as medidas necesarias para garantir o exercicio coordinado das competencias de cada unha das partes e en xeral, resolver os problemas de interpretación e cumprimento que poidan xurdir na aplicación deste convenio.
“A información continua e precisa sobre o estado dos recursos dos montes é imprescindible para abordar as políticas forestais, non só para responder a problemas específicos senón tamén para valorar o impacto destas políticas no apoio e desenvolvemento dun sector estratéxico para o rural galego como é o forestal”, tal e como se indica dende a consellería
Ademais este convenio dá cumprimento a unha das recomendacións do Ditame da Comisión especial non permanente de estudo e análise das reformas da política forestal, de prevención e extinción de incendios forestais e do Plan Forestal de Galicia. Este órgano parlamentario sinalaba que era necesario crear un Sistema de Información e Estatística Forestal de Galicia, como mecanismo que permitise facer diagnoses adecuadas e ser unha ferramenta esencial para a toma de decisións de políticas públicas ou empresariais relacionadas con este sector.
