Descubrir as singularidades dos viños envellecidos en barrica, así como as diferentes madeiras utilizadas para iso. É a posibilidade que lle ofrece aos interesados no mundo do viño o novo curso de cata, que se iniciaba na mañá deste 22 de xuño e que continuará mañá. Trátase dunha iniciativa promovida pola Ruta do Viño de Valdeorras, baixo o título da “Arte do viño envellecido”. Nela participaban unhas 15 persoas procedentes de Ponferrada (León), A Coruña, Guadalaxara e Valdeorras.
O programa comezaba ás once deste sábado no Hotel A Calzada (Vilamartín), e consta de dous apartados. A cata de viños brancos (un total de 16 godellos) da D.O. Valdeorras será durante a xornada matinal e a de tintos (14 viños) pola tarde.
O día 23, levarase a cabo a parte máis lúdica do curso coa visita ao Parque Natural Serra da Enciña da Lastra (Rubiá) onde se realizará unha ruta circular de 4 km, que concluirá cun brinde en horario de (11’30-13’30). A actividade que está dirixida polo director técnico do Consello Regulador de Valdeorras Jorge Mazaira, e o prezo da inscrición é de 30€ por persoa.
Fotos: Mónica G. Bellver/ cedidas.
