ConcellosÚltima hora

Entra entra en vigor a normativa que limita a velocidade de circulación xenérica en núcleos urbanos a 30 km/h en vías dun só carril por sentido

Isto coincide ademais coa campaña para a vixilancia e control da velocidade posta en marcha pola DXT entre o 10 e o 16 de maio

Circulación por unha das vías do centro do Barco.

 

Neste martes vén de entrar en vigor o Real Decreto 970/2020, de 10 de novembro, que introduce diversas novidades no regulamento do tráfico urbano. Nun acto celebrado esta mañá en Ourense, no que participaban o subdelegado do Goberno, Emilio González, xunto ao xefe provincial da Dirección Xeral de Tráfico, David Llorente; o capitán xefe do Subsector de Tráfico da Garda Civil en Ourense, Isaac de Toro; e a intendente xefa da Policía Local de Ourense, María Barrera, entre outras autoridades comentábanse os detalles da nova normativa.

Esta nova normativa establece os límites de velocidade xenéricos en zona urbana:

· 20 km/ h en vías que dispoñan de plataforma única de calzada e beirarrúa.

· 30 km/h en vías dun único carril por sentido de circulación, fronte aos anteriores 50 km/h.

· 50 km/h en vías de dous ou máis carrís por sentido de circulación.

Estas velocidades xenéricas poderán ser rebaixadas, previa sinalización específica, pola Autoridade municipal.

O subdelegado do Goberno destacou que o obxectivo é reducir a accidentalidade vial, sobre todo a que afecta aos colectivos máis vulnerables (peóns, ciclistas e motoristas); garantir a fluidez dos desprazamentos realizados nas grandes avenidas das cidades; e reducir o impacto negativo da circulación de vehículos na calidade do aire das cidades. “Trátase dunha aposta decidida por unha mobilidade segura, sostible e saudable nas nosas cidades”.

 

Acto celebrado en Ourense con motivo da entrada en vigor da nova normativa de circulación en vías urbanas.

 

Emilio González subliñou que o risco de falecer en caso de atropelo a 50km/h elévase ata o 90% fronte ao 10% coa limitación a 30 km/h. Ademais, segundo indican as estatísticas, o número de falecidos coa redución da velocidade de 50 km/h a 30 km/h rebáixase ata un 40%.

Esta medida, segundo lembraba o subdelegado, foi demandada polos concellos a través da Federación Española de Municipios e Provincias (FEMP) e polas grandes cidades, como Madrid, Barcelona ou Bilbao, e ten en conta as medidas que desde hai varios anos foron implantando moitos deles. Ademais, conta co impulso da Unión Europea e das Nacións Unidas. “Coa redución do límite de velocidade búscase axudar a converter as cidades en espazos máis seguros, reducindo o risco de sufrir accidentes e a gravidade dos mesmos”, indicou González Afonso.

Campaña de vixilancia e control da velocidade da DXT

A entrada en vigor da limitación da velocidade urbana coincide coa campaña para a vixilancia e control da velocidade posta en marcha pola DXT entre o 10 e o 16 de maio. O obxectivo é concienciar sobre a perigosidade do exceso de velocidade na condución, así como exercer unha labor preventiva coa presenza de patrullas, á vez que se vixían e controlan os excesos de velocidade mediante radares fixos, estáticos e móbiles.

Así mesmo, esta campaña da DXT lévase a cabo na semana anterior á celebración da VI Semana Mundial para a Seguridade Vial que, auspiciada polas Nacións Unidas, celebrarase entre os días 17 e 23 de maio. O lema escollido este ano céntrase tamén na redución do límite de velocidade a 30 km/h nas zonas urbanas, baixo o lema “Construíndo rúas para a vida” (Streets for Life #Love 30).

Artigos relacionados

Back to top button