Na mañá do 26 de setembro celebrábase na Escola Galega de Administración Pública (EGAP) de Santiago de Compostela unha xuntanza da Comisión de seguimento dos GES na que participou a Fegamp (Federación Galega de Municipios e Provincias), xunto coa Dirección Xeral de Emerxencias, a Dirección Xeral de Administración Local, a Dirección Xeral de Montes e os representantes das catro deputacións galegas. O motivo da reunión era pactar entre todas as administracións con competencias en materia de emerxencias a continuidade dos Grupos de Emerxencias Supramunicipais (GES) xa que o convenio a través do cal se puxeron en marcha remata en decembro de 2018.
O presidente da Fegamp e alcalde do Barco, Alfredo García, presentaba no decurso da comisión a proposta que se elaborou tras unha reunión mantida este verán na sede da federación con todos os rexedores con GES e sobre a cal se está a traballar para chegar a acordo. O financiamento destes grupos e as funcións que deberán realizar foron as principais cuestións a debate.
En canto as funcións dos GES as partes estaban de acordo en que deberán realizar funcións relacionadas con prevención de incendios e emerxencias pero “tentarase afinar na redacción do mesmo para que non haxa lugar a dúbida en canto ás funcións que deberán desenvolver” explicaba o presidente da Fegamp tras a reunión.
Alfredo García especificou tamén que a Comisión dos GES volverá reunirse dentro de 15 días para levar afinada a redacción do convenio e incluír todas aquelas cuestións que se puxeron hoxe enriba da mesa.