Son moitos os contacontos que se realizan ao cabo do ano na Biblioteca Pública do Concello de Verín, pero o da tarde do 23 de xuño era diferente e moi especial. Dúas rapazas voluntarias desta instalación cultural, Noelia Gallego e Inés García, facían unha lectura do texto “A galiña azul” (de Carlos Casares) para Eduardo Carnero, estudante de Dereito, amante da gaita galega, concelleiro no Concello de Cualedro por CxG e que é invidente.
A experiencia resultaba “magnífica e agardamos repetila, e coma dixo Eduardo Carnero, esperando non ser o único“, segundo sinalan dende a Biblioteca de Verín. A idea orixinal deste contacontos era de Flor Ojea, profesora de Eeducación Física e que acompaña a Eduardo Carnero nos cursos de natación nas piscinas climatizadas do Concello de Verín.
Fotos: Biblioteca Municipal de Verín