Manuel Villanueva de Castro, director Xeral de Contidos de Mediaset, recibía esta mañá no salón de actos da Casa Consistorial de Quiroga, a Insignia de Ouro deste Concello con pergamiño acreditativo.
O alcalde de Quiroga en funcións, Julio Álvarez, fíxolle entrega deste recoñecemento tras a firma de Manuel Villanueva no libro de ouro do Concello.
Villanueva de Castro tivo palabras de agradecemento para Quiroga e os quirogueses. “Quiroga e vos formades parte do meu mapa sentimental e non faltei nunca á nosa cita anual, da que non houbo nin haberá pandemia que o impida. En poucos sitios me sinto tan a gusto como nesta terra de vontade. Levarei esta ilustre distinción que me concede a Corporación municipal, con orgullo e con honra, alá onde vaia direi que este é o símbolo dunha poboación xenerosa e hospitalaria, merecedora de todalas cousas boas”.
Como remate deste acto solemne pero sinxelo, Julio Álvarez, agradecía a Villanueva todo o que sempre fixo por Quiroga. “É unha mínima expresión do que sempre fixeches por Quiroga, con ese interese polo evento máis importante que ten o municipio, a Feira do Viño, tanto cos pregoeiros como coa proxección que se fai desde todas as canles de Mediaset”.