A Central Hidroeléctrica de San Estevo, en Nogueira de Ramuín, recibía nesta semana a visita de 15 alumnos do IES Xermán Ancoechea Quevedo de Trives. Os estudantes de último curso do Ciclo Superior de Electricidade, acompañados dos seus profesores e persoal de Iberdrola, coñecían de preto o funcionamento e o proceso necesario para xerar enerxía eléctrica desde o interior do maior complexo hidroeléctrico de Galicia .
Tras percorrer a coñecida caverna de Santo Estevo II, os alumnos subiron ao alto da presa onde gozaron a 115 metros de altura das impresionantes vistas que custodian o encoro de Iberdrola sobre o río Sil. A instalación ourensá é pioneira na rexión por producir enerxía equivalente ao consumo medio anual de máis de 600.000 persoas, case o dobre da poboación da provincia de Ourense.
