Soleada xornada de fútbol no Aguillón, na Rúa. Na tarde deste domingo 22 de xaneiro o campo Vicente Solarat Maceda acollía un novo partido de liga de Segunda Galicia, no que se mediron dous equipos da cabeza da clasificación: o CD Rúa e o Antela FC “B”.
Era o equipo local o que se adiantaba no marcador cun gol de Bruno no minuto 20 e a partir de aí, a pesar de intentalo por ambas partes custaba aproximarase ás porterías, rematando a primeira parte co 1-0.
Tralo paso polo vestiario, os de Xinzo empataban o encontro cun gol no minuto 65, sendo Adrián o encargado de inclinar a balanza cara os do Rúa ao transformar un penalti no minuto 85.
Con este resultado os de Javier Ferrer recuperan o segundo posto da liga, con 36 puntos, a dous do líder o CD Viana, que vencía no seu desprazamento ata o campo do Agro co 1-3 ante o CD Trives. O cuarto equipo do oriente ourensán que xoga no grupo 3 da categoría, o CD Córgomo Vilamartín, tiña a xornada de descanso.
Aproveitando o sol da tarde, eran moitos os afeccionados que se achegaron ata o campo para ver xogar ao conxunto amarelo e azul, entre eles a xogadora do equipo infantil Iria Acevedo, recentemente operada trala lesión sufrida a semana pasada no partido de Verín.
Fotos: Mónica G. Bellver.